Asiaq-mi GIS-imi geodata-milu immikkut ilisimasalimmik misilittagalimmik pissarsiorpugut, sulilersussap ilaatigut NunaGIS-portalimi (www.nunagis.gl) aammalu tassunga atasumi ArcGIS Enterprise system-imi ineriartortitsillunilu ingerlatsissaaq. 1. Januari 2025 aallarnerfigalugu Asiaq-mit nuna tamakkerlugu NunaGIS-portali akisussaaffigineqalerpoq. Taamaattumik sulisumik tunniusimasumik pikkorissumillu sulisussarsiorpugut, taassumalu NunaGIS-portalip inuiaqatigiinnit atorneqarsinnaanissaa atoruminartuunissaalu qulakkeerinneqataaffigissavaa, aammalu soqutigisallit paasissutissanik suliaqarnissaannut ikiussallugit.

NunaGIS suliassallu pillugit 
NunaGIS tassaavoq Kalaallit Nunaanni nunap assingi geodatallu pillugit pisortatigoortumik nittartagaq, portaleqarnermi siunertaavoq inuiaqatigiinnut attuumassusilinnik paasissutissanik pisortaqarfinnit assigiinngitsunit katersinissaq takutitsinissarlu. GIS-imi geodatanilu immikkut ilisimasalittut akisussaaffigissavat nunaGIS-portalip system-illu tassunga atasut ulluinnarni ingerlanneqarnissaata qulakkeerneqarnissaa, ineriartortinneqarnissaa pitsaasuunissaa, taakkualu Asiaq-mi geodata-nik suliaqarnermi pingaaruteqarluinnarput. Suliffeqarfiup iluani sulisunik avataaniillu suleqatigisartakkagut qanimut suleqatigalugit aaqqiissutinik ineriartortitsissaatit, taakkualu pisortaqarfiit, inuussutissarsiorfiit inuiaqatigiillu geografisk-it pillugit paasissutissat pisariaqartitaat malissavaat.

Portalimi ineriartortitsinissamut pingaaruteqartoq tassaavoq portalip suliffeqarfinnut pisortaqarfinnullu pisariitsuunissaa paasiuminarnerunissaalu kiisalu paasissutissat pisortaqarfinnit assigiinngitsuneersut imarineqarsinnaassallutik. Suliassaq pingaartut ilagaat paasissutissat nutaajunissaasa qulakkeerneqarnissaat aammalu paasissutissanut metadata-t ilanngunneqarsimanissaat, taamaalilluni pisariitsumik takuneqarsinnaassalluni paasissutissat sorliit pisortaqarfinnit sorlernit pigineqarnersut, paasissutissat sunik imaqarnersut aammalu paasissutissat qanoq atorneqassanersut.

Pingaaruteqartuttaaq ilagaat eqaatsuunissat aammalu immikkoortortaqarfiup iluani pisariaqartitsisoqartillugu suliassanik allanik tiguserusussuseqarnissat. Avatangiisini allanngorartumi suleqatigiiffiusumilu sulivugut, taamaattumik immikkoortortaqarfiit akimorlugit suleqatigiinnissaq pingaaruteqarpoq, aammalu sulinermi avatangiisit tatigeqatigiiffiusut peqataatitsisullu pingaartippagut.

Suliassat

• NunaGIS-portalip ineriartortinneqarnissaa aserfallatsaalineqarnissaa, tassunga ilanngullugu imarisaa, atoruminassusaa atortuilu.
• Geodata-nik takutitsinissamut nittartakkatigut nunat assinginut kiffartuussinerit ineriartortinneqarnissaat aserfallatsaalineqarnissaallu.
• System-imi paasissutissat eqqortuunissaat nutarterneqarsimanissaallu pillugit pisortaqarfinnik, kommuninik soqutigisalinnillu allanik suleqateqarneq.
• System-ip ArcGIS Enterprise-p ingerlanneqarnissaa, ineriartortinneqarnissaa uppernarsaasersornissaalu.
• Paasissutissat pillugit metat data-qarnissaa qulakkeerneqarnissaa, taamaalilluni atuisut pisariitsumik paasissutissat takusinnaallugillu paasisinnaassavaat.
• NunaGIS-imik tassaniittunillu geodatanik atuisunut kiffartuussineq siunnersuinerlu.
• Piginnaasannik suliarisinnaasannillu pisariaqartitsisoqartillugu suleqatinut allanik suliassalinnut ammasuuneq.

Piginnaasat

• Naapertuuttumik ilinniarsimaneq, imaluunniit geografip, geoinformatik, GIS, IT taakkununngaluunniit attuumassusillit iluani misilittagaqarneq.
• GIS-software-mik aammalu aaqqiissutinik webGIS-iusunik misilittagaqarneq (ajunngippat ESRI-nik).
• Paasissutissanik geo-nut system-inik ineriartortitsinernik ingerlatsinernillu misilittagaqarneq, pitsaassaqaaq pisortaqarfiit iluanniusinnaappat.
• Namminersorluni sulisinnaaneq aammalu suliassaqarfiit akimorlugit suleqatiginnissinnaaneq.
• Iluaqutaasinnaavoq timikkut inissisimalluarnissaq aammalu issittumi pinngortitami suleqataanissamut soqutiginninneq.
• Sulinitsinnut atatillugu biilertariaqartaratta biilernermut allagartaq B-mik qaffasissulik piumasaqaataavoq.
• Allattariarsornikkut oqalussinnaanikkullu kalaallisut, tuluttut qallunaatullu attaveqarluarsinnaaneq.

Asiaq pillugu
Asiaq suliffeqarfiuvoq Namminersorlutik Oqartussat namminersortitaat, tassanilu sulisut 20-upput. Suliffik Nuummi inissisimavoq, Kalaallit Nunaannilu avatangiisit tigussaasut uagut nunap assiliarisarlutigillu nalunaarsortarpagut. Suliagut inuussutissarsiutilinnit, pisortaqarfinnit, ilisimatusartunit inuiaqatigiinnillu atorneqartarput. 

Asiaq-mi piginnaasatigut qaffasissumik inissisimavugut, suleriaaserpullu ammasuulluni, suliassaqarfiit akimorlugit sulisarpugut. Silaannaap pissusaanik ilisimatusarnermi, aatsitassat pillugit ilisimatusarnermi, pinngortitanik illersuinissamut aammalu sanaartornissamut pilersaarusiornermi atorneqartussanik Geospatial-imik attaveqaasersuinermut paasissutissanillu suliaqartarpugut. Immikkoortortaqarfimmi suliffigisassanni ilaatigut Kalaallit Nunaanni najugaqarfiit nunap asseqarnissaat, umiarsualivinni immap ilusaa aammalu nunanik uuttortaanerit sulissutigineqartarput.

Atorfininnermi atugassarititaasut:

Sapaatip-akunneranut akunnerit 40-t sulisoqartarpoq.

Atorfininneq Namminersorlutik Oqartussani allaffissornikkut pisortanut kattuffiullu attuumassuteqarfigisap akornanni isumaqatigiissutaasimasut naapertorlugit inissisimapput. Atorfik initaqanngilaq, inissamilli ujarlernermut Asiaq ikiuussinnaavoq. Atorfinittoq Namminersorlutik Oqartussat inaataanni sulisut inaanni najugaqareersimaguni, inini paariinnarsinnaavaa. Atorfiup qimannerani atorfeqarnermi inigisaq aamma qimanneqassaaq. Atorfininnermut atatillugu nutsernissamut angalanissamullu aningaasartuutit ilinnut aappannut meeqqannullu attuumassusillit aammalu minnerpaamik ukiut pingasut sulereernerup kingorna uternissamut aningaasartuutit uatsinnit akilerneqassapput.

Ulloq atorfiniffissaq: 

Marsip aallaqqaataa 2025, isumaluunniit isumaqatigiissuteqarnikkut.

Paasissutissat sukumiinerusut:

Paasissutissanik sukumiinerusunik pissarsiniaruit pisortaaneq Mette Skarregaard Pedersen msp@asiaq.gl -mut saaffigineqarsinnaavoq. Asiaq pillugu uani paasisaqarnerusinnaavutit www.asiaq.gl.

Qinnuteqarnissamut killigititaq: 

Qinnuteqaat kingusinnerpaamik pingasunngorneq 12. februari 2025 nassiunneqassaaq. Qinnuteqaat, CV ilinniarsimanermullu uppernarsaatit linki tulliuttoq atorlugu nassiunneqassapput https://asiaq.career.emply.com/da/apply/are-you-our-new-gis-and-geodata-specialist/47epw5. 

Oqaloqatiginninnerit: 

Naatsorsuutigaarput sapaatip-akunnera 8-mi oqaloqatiginnissalluta.