Suut neqeroorutigisinnaavagut?
Asiaq-mi nunanik uuttortaasartutut sulininni suliassat assigiinngitsut pissanganartullu suliarisalersinnaavatit. Atorfik Nuummi inissisimavoq, aasakkulli Kalaallit Nunaanni sumiiffinni assigiinngitsuni sulisarpugut. Atorfimmi akisussaassuseqartumik ingerlatsineq kiffaanngissuseqarnerlu misigisassaapput, suliassaqarfiit akimorlugit sulisarpugut, aammalu suleqatit ammasumik oqaloqatiginissaat isumasioqatiginissaallu pingaartitaralutigu.

Pingaarnertut suliassatit tassaapput GNSS totalstationillu atorlugit teknikkitigut nunanik uuttortaaneq aammalu naleqqiussiffiusartunik aserfallatsaaliineq. Suliassat ilagaat pilersaarusiorneq, paasissutissanik suliaqarneq nalunaarusiornerlu. Taakkua saniatigut bathymetrit dronellu atorlugit uuttortaanerni peqataasarsinnaavutit, taakkualu suliarineqartarput GIS-imi 3D-milluunniit takussutissanik suliaqarnermi ortofotoliornernilu.

Nunanik uuttortaanitsinni atortut nutaaliaasut soorlu Trimble S7, totalstationit TSC7 controlleritallit, Trimble R10 GNSS kiisalu sului aalajangersimasut quadkopter dronerillu atortarpagut. Erngup ataani misissuitilluta single- aamma multibeam echosounder atortarpagut. Paasissutissanik katersinissaq pilersaarusiorneqartarpoq suliallu softwaret soorlu MicroStation, Trimble Business Center, ArcGIS aamma Pix4D atorlugit suliareqqinneqartarlutik.

Kinaavit?
Nunanik uuttortaasumik teknikkitigut totalstation aamma GNSS atorlugit uuttortaanermik misilittagalimmik aammalu paasissutissanik CAD-imi GIS-imilu nakkutiginnissinnaasunik suliaqaqqissinnaasumillu ujartuivugut. 

Alapernaatsuussaatit, ilikkarusussuseqarlutit suliassanillu nutaanik tiguserusussuseqarlutit. Asiaq-mi sulinitsinni suliassaqarfiit akimorlugit sulisarpugut, taamaattumik suliassaqarfiginngisanni sulisinnaanissat takorloorparput ikiuussinnaanissallu, taamaalillutit piginnaasaqarnerulissaatit piginnaasatillu atorluarneqarnerussallutik. Suleqateqarusussuseqassaatit, peqqissaartuullutit attaveqallaqqissuullutit, suleqatigiit iluanni avataanilu sullittakkanut attaveqaqatigiinnerup pitsaasup pilersinneqarnissaa soqutigisarissavat. Timikkut pisinnaasaqassaatit issittumilu nunami sulinissannut piareersimassallutit. Sulinissannut biilersinnaanissat piumasaqaataammat biilersinnaanermut allagartaq B-mik qaffasissusilik pigisariaqarpat.

Asiaq suua?
Asiaq suliffeqarfiuvoq Namminersorlutik Oqartussat namminersortitaat, tassanilu sulisut 21-upput. Suliffik Nuummi inissisimavoq, Kalaallit Nunaannilu avatangiisit tigussaasut uagut nunap assiliarisarlutigillu nalunaarsortarpagut. Suliagut inuussutissarsiutilinnit, pisortaqarfinnit, ilisimatusartunit inuiaqatigiinnillu atorneqartarput. 

Asiaq-mi piginnaasatigut qaffasissumik inissisimavugut, suleriaaserpullu ammasuulluni, suliassaqarfiit akimorlugit sulisarpugut. Silaannaap pissusaanik ilisimatusarnermi, aatsitassat pillugit ilisimatusarnermi, pinngortitanik illersuinissamut aammalu sanaartornissamut pilersaarusiornermi atorneqartussanik Geospatialimik attaveqaasersuinermut paasissutissanillu suliaqartarpugut.

Atorfininnermi atugassarititaasut:
Atorfininneq Namminersorlutik Oqartussani allaffissornikkut pisortanut kattuffiullu attuumassuteqarfigisap akornanni isumaqatigiissutaasimasut naapertorlugit inissisimapput. Atorfik initaqanngilaq, inissamilli ujarlernermut Asiaq ikiuussinnaavoq. Atorfinittoq Namminersorlutik Oqartussat inaataanni sulisut inaanni najugaqareersimaguni, inini paariinnarsinnaavaa. Atorfiup qimannerani atorfeqarnermi inigisaq aamma qimanneqassaaq. Atorfininnermut atatillugu nutsernissamut angalanissamullu aningaasartuutit ilinnut aappannut meeqqannullu attuumassusillit aammalu minnerpaamik ukiut pingasut sulereernerup kingorna uternissamut aningaasartuutit uatsinnit akilerneqassapput.

Ulloq atorfiniffissaq: 
1. september 2026 isumaluunniit isumaqatigiissuteqarnikkut.

Paasissutissat sukumiinerusut:
Paasissutissanik sukumiinerusunik pissarsiniaruit allaffimmi pisortaq Frederik Hass freh@asiaq.gl -mut saaffigineqarsinnaavoq. Asiaq pillugu uani paasisaqarnerusinnaavutit www.asiaq.gl. Ulluinnarni suleriuutsitsinnik suliffeqarfitsinnillu paasisaqarnerorusukkuit, Asiaq Facebook-imi aamma LinkedIn-imi malinnaaffigiuk

Qinnuteqarnissamut killigititaq: 
Qinnuteqaat kingusinnerpaamik ataasinngorneq 6. juli 2026 nassiunneqassaaq. Qinnuteqaat, CV ilinniarsimanermullu uppernarsaatit linki tulliuttoq atorlugu nassiunneqassapput https://asiaq.career.emply.com/da/karriere. Qinnuteqartut ingerlaavartumik oqaloqatiginninnissamut aggersarneqartassapput.